Su prèssiu

Su prèssiu. Una scoberta totu sparadesa

In bidda su prèssiu ddu eus sempri connotu ca nci fiat s’aràngiu, chi custu capatzi chi ddu apant portau is Fenìcius o is Saracenus, tanti chi nci fiat unu furriadroxu chi ddu narànt Ortixedru. Est craru ca s’agrumi s’agatàt giai in su Milliduxentus o Millitrexentus, forsis innantis puru, e ca cun su poderi spanniolu est arrennèsciu. Fiat cosa po arricus, ca sa mellus terra dda teniant issus, ca fiat a su costau de is arrius e sendi terra de torru fiat grassa e bulla. Calincunu arrogheddu sceti fiat in is manus de su pòburu “benestanti” e, sigumenti ca fiat pagu, nci poniat dònnia cosa, dònnia calidadi de fruta. Ddu traballàt a manu o cun su burricu, chi atacàt a s’arau sardu, est a nai de linna, o de ferru, e logu po girai ndi boliat pagu. Aici ant inghitzau a connosci su prèssiu, chi ddu prantànt in mesu de s’agrumi aundi nci fiat unu pagu de logu, ma fiat prèssiu de pisu. Nosu puru de prèssiu ndi emus prantau otanta aras in su 1948, e apustis de tres annus emus prantau is agrumis puru.

Su prèssiu in Santu Sperau ddoi est de is primus de su Noixentus,  chena unu sceberu beru, fiant matas de pisu, de prèssiu aresti afrancau (ddi naraus de Santa Maria), nàscias solas, no infertadas. A cuss’ora calidadis sceberadas no ndi connoscemus, a su mancu innoi in bidda, unu de is difetus fiat ca no podiast contai de tenni dexi matas agualis.

Data di ultima modifica: 05/01/2017

torna all'inizio del contenuto
torna all'inizio del contenuto